Istória tenke deskreve no análiza mudansa husi tempu ba tempu

Dili, 9 Novembru 2019 (CO25) – Tuir istoriadór, Dr. Max Lane katak, istória tenke deskreve no análiza mudansa-sira husi tempu ba tempu no tenke hatene mós kauza no efeitu husi mudansa-sira ne’ebé akontese iha pasadu.

“Tenke hatene saida mak muda. Laos deit saida mak autór-sira halo iha prosesu ba vitória. Maibe Povu Timor, Forsa Polítika, Kultura, no situasaun povu Timor kuaze tinan 40 ne’e;  saida mak muda durante prosesu no mudansa ne’e oinsa. Tamba, se la halo nune’e, iha ema nia mentalidade dalaruma haluha katak iha mudansa”.

Dehan Max Lane bainhira dada-lia ho Mídia Comité Orientadór 25 iha edifísiu CO25, Vila verde, Dili, 9 Novembru 2019.

“Iha Ne’ebé deit, nasaun ka povu ida la hatene nia orijen, la hatene kauza no efeitu ne’ebé hamosu situasaun-sira ohin loron. Imposivel situasaun-sira ohin loron prosesa, muda tuir ita nia hakarak. Orijen husi situasaun komunidade ohin loron mak sikuénsia kauza no efeitu ne’ebé akontese uluk ka iha pasadu”, dehan Dr. Max Lane.

Dr, Max Lane mós hateten, sei tulun servisu peskiza Comité Orientadór 25-nian depende tempu no forsa ne’ebé iha.

Dr. Max Lane, dosente vizitante iha fakuldade Siénsia Sosiál no Polítika, Universidade Gajah Mada no bainaka ka vizitante Senior ba Institutu ba Estudu Sudueste Aziátiku, Institutu Yusof Ishak. Hakerek –nain no manorin-nain iha Indonázia-nia polítika, Istória, literature no asuntu sudueste aziátiku. Hanesan ativista ne’ebé servisu ba Timor-nia kazuba Independénsia durante okupasaun.