AMRT REALIZA ESPOZISAUN NO SEMINÁRIU HODI KOMEMORA LORON PROKLAMASAUN INDEPENÉNSIA BA DALA 46

Same, 22 Novembru 2021 ©25) – Atu selebra loron Proklamasaun independénsia ba dala 46, Arquivo e Muzeu da Rezisténsia Timorense (AMRT) realiza espozisaun no semináriu ba Joventude no Estudante iha munisípiu Manufahi ho tema “INVASÃO E RESISTÊNCIA NACIONAL”.

Iha abertura ba Semináriu Nasionál ne’e Diretór Ezekutivu AMRT nian, Hamar Antoninho Batista Alves hateten “AMRT nia funsaun importante ida mak divulgasaun ba Semináriu, semináriu ne’e informa proekupasaun direita, rekolla mos dadus husi testemunha sira ho ninia tema ne’ebé dedikadu no espesiál”.

Hamar mos hateten katak “Sé semináriu ita halo iha Dili deit, ita sente katak esperiénsia sira ne’e ita fahe fali ba ema internasionál sira mak mai aprende, tamba ne’e mak Ami konvida ita nia Aman no maun sira mai besik iha munisípiu atu estudante no komunidade bele rona direita saida mak uluk akontese iha Rai liur, iha Ai-laran tantu ina vila laran nune’e mos papél uma kreda durante luta.

Iha Fatin hanesan Administradór Munisípiu Manufahi, Arantes Isaac Sarmento hateten “Hanesan servidór povu manufahi agradese tebes ba AMRT bele lori atividade ida ne’e mai to’o Munisípiu, atividade ne’ebé mai ho espozisaun no semináriu, ida ne’e importante tebes foin sae sira atu bele hatene diak liu ita nia istória luta ba libertasaun Patria.

Administradór Munisípiu Manufahi os dehan katak “Libertasaun da patria laos buat fasil, defísil ho prosesu naruk tebes, ne’e hatudu ema ne’ebé iha domin bo’ot ba nasaun mak bele halo, ema ne’ebé defende nia rai mak oferese nia-an liberta ita nia patria. Jerasaun foun iha responsabilidade no obrigasaun atu hakerek istória ba libertasaun povu ida ne’e, atu servi atu hadia dezenvolvimentu rai ida ne’e importante tebes”.

Sai oradór iha semináriu ne’e mak Dr. Jose Ramos Horta, hoto’o konabá luta externa nian, Gil Monteiro “Oan Soru” atuál Sekretáriu Estadu ba Asuntu Kombatente Libertasaun Nasionál hato’o konaba Luta iha Frente Armada nian, Constâncio Pinto “Terus”, Prezidente CO25 hato’o konaba Luta Frente Klandestina nian no Pe. Juvito hato’o konaba papél Uma Kreda iha tempu rezisténsia.

Enkuantu Semináriu ne’e halo iha salaun konferensia Universidade Don Boaventura Same/Manufahi.