CO25 HAMUTUK HO CNC.IP REALIZA SEMINÁRIU HODI HANOIN HIKAS LORON 10 DE JUNHO “LEVANTAMENTU MARABIA”
Dili, 9 Juñu 2022 (CO25) – Comite Orientador 25 hamutuk ho Centro Nacional Chega.IP realiza semináriu hodi hanoin hikas loron 10 de junho “Levantamentu Marabia” ba tinan 42 iha Antigu komarka, Balide, Dili.
Iha abertura ba Semináriu ne’e, Vise Ministru Edukasaun no Desportu, António Guterres “Agradese ba kolaborasaun Servisu ne’ebé diak husi CO25 no CNC”. Hodi hanoin Hikas Loron 10 de Junho, vise Mi istru hateten “ne’e hanesan oportunidade ida liliu ba sobrevivente sira hotu atu fahe fila-fali informasaun no hanoin sira hotu kona ba levantamentu Marabia hodi hatutan fali ba jerasaun foun sira, joven no labarik-sira atu aprende no apresia nu’udar matadalan ba sira nia moris no nu’udar individu nomoos nu’udar sidadaun Timor-nian”.
Enkuantu Diretor Ezekutivu Cento Nacional Chega, Hugo Fernandes iha abertura ba semináriu ne’e hateten katak, “Luta ba ukun rasik an nu’udar Luta Populár, luta ema hotu nian. Tamba luta ema hotu nian mak levantamentu sira hanesan ne’e bele akontese”. Nia parte mos agradese ba parseria ne’ebe diak tebes ho Comite Orientador 25 “Fiar katak liu husi eventu sira hanesan ne’e ita bele hahú hametin ita nia memória no hametin ita nia identidade hanesan Timororan”.
Prezidente Comite Orientador 25, Constâncio Pinto “Terus” agradese ba parseria ho CNC ne’ebe lao diak tebes hahu kedas husi estabelesimentu Akordu servisu hamutuk entre instituisaun rua”. Prezidente CO25 mos hateten katak “Akontesimentu 10 de Junho 1980, akontesimentu ne’ebe importante mos ba ita nia luta. Ohin loron istoria akontesimentu ne’e konta variavel depende ba autor-sira nune’e importante realiza seminariu ida ne’e atu halo reflesaun klean liu tan”.
Constâncio Pinto mos hateten, “CO25 nia kna’ar mak atu hakerek istória no Akontesimentu 10 de Junho mos hola parte ba peskiza ne’e, tan ne’e semináriu ne’e importante atu hatene loloos nia verasidade no liu husi seminariu ne’e atu ita bele fo onra no dignifika ba ita nia maluk sira ne’ebe sai vítima ba akontesimentu ne’e”.
REMATA