Constâncio Pinto “Terus”: Manifestasaun Tasi Tolu Mak Ejize Frente Armada Kria CE CNRM/FRETILIN iha Frente Clandestina
Same, 22 Novembru 2021 (CO25) – Prezidente Comite Orientador 25, Constâncio Pinto “Terus” hateten husi Manifestasaun Tasi-tolu mak ejize Frente Armada kria Comite Esecutivo do CNRM/FRETILIN iha Frente Clandestina.
Lia hira ne’e hato’o bainhira sai oradór ba Semináriu nasionál iha ámbitu komemorasaun loron proklamasaun Independénsia ne’ebá organiza husi Arkivu Muzeu Rezisténsia Timorense (AMRT) ho tema “Invasão e Resistênsia Nacional”, Same 22 Novembru 2021.
Constâncio Pinto hateten ”Husi manifestasaun iha Santu Padre nia Vizita iha Tasi tolu mak ezize Frente Armada, Komando Superior da Luta kria Orgaun ida iha Frente Klandestina , nune’e iha Maiu 1990 Komando Superior da Luta iha kongresu estraordináriu Aitana (Kongresu Aitana) hasai rezolusaun hodi Kria Comite Ezekutivu do CNRM/FRETILIN iha Frente Klandestina.
Prezidente CO25 mos hateten katak “Ho Instrusaun husi Komando Superior da Luta nian mak ami kria Comite Ezekutivu iha externato São Jose, ami halo eleisaun ida hodi hili, hau (Constâncio Pinto “Terus”) hanesan Sekretáriu Comite Esekutivo CNRM/FRETILIN iha Frente Clandestina ho vise mak Jose Manuel Fernandes “Nakfilak”, Pedro Klamar Fuik no Antonio Aitahan Matak no ho membru sira seluk, ho nune’e implementa polítika hodi halo asaun pasífika sira hodi hatudu ba mundu, husi asaun lubuk sira ne’ebé akontese iha fatin barak, ida mak asaun manisfestasaun pasífika Iha Santa Cruz ne’ebé militár Indonézia sira hamosu masakre”.
Molok taka, prezidente CO25 dezafia Joven no estudante sira hodi hatete katak “joven uluk fo-an tomak liu husi meius oi-oin hodi liberta patria, ohin ukun-an ona, oferta saida los mak nudar juventude no estudante fó ba rai doben ida ne’e. Ita liberta-an ona husi okupasaun koloniál sira maibé ohin ita seidauk liberta husi kiak, tan ne’e mak papél importante estudante nian atu estuda didiak no tau iha kakutak saida mak atu halo bai ta nia rai. Ita hotu pelo menus lakon ita nia membru família ida ba rai ida ne’e, tan ne’e mai ita fó onra ba sira ne’ebé fo-an ba rai ne’e liu husi ita nia dedikasaun eskluziva ba halakon pobreza no konstrusaun paz no dezenvolvimentu ba rai ida ne’e.
Enkuantu sai mos oradór iha Semináriu ne’e mak Eis prezidente no Premiadu Nobel da Paz, Dr. José Ramos Horta, Sekretário Estadu ba Asuntu Kombatente Libertasaun Nasionál, Sr. Gil da Costa Monteiro “Oan Soru” no Amo Juvito.