OCR BAUCAU REALIZA PRIMEIRA KONFERÉNSIA NO KONSOLIDASAUN BA EZISTÉNSIA MUZEU CENÁRIO DA MEMORIA DO POVO
Baucau, 18 Novembru 2023 – Organizasaun Comite Rejional (OCR) Baucau hamutuk ho komunidade Ossoluga, Samalari realiza primeira konferénsia ba ezisténsia Muzeu Cenário da Memoria do Povo no Konsolidasaun membru Comite Ezecutivo (CE) da Frente Clandestina ho OCR.
Tuir Prezidente Komisaun organizadora, Domingos Soares “Trakoka” hateten katak, Konferénsia no konsolidasaun ne’e realiza ho objetivu atu formula no defini estatutu ezisténsia Muzeu Cenário da Memoria do Povo ne’ebe inagura ona iha tinan 2012 liu ba.
“Iha ne’ebe deit bainhira hakarak hari’i Muzeu Cenârio da Memoria do Povo ne’e mai husi rezultadu prosesu funu, ita ne’ebe sei moris fo agradese ba ita nia maun alin ne’ebe fo-an tomak sosa independénsia” hateten prezidente komisaun organizadora.
Enkuantu iha intervista ba jornalista-sira, prezidente Comité Orientadór 25, Constâncio Pinto “Terus” ne’ebe sai mos oradór iha konferénsia ne’e hateten, atividade sira nune’e importante hodi komunidade-sira bele fahe sira nia esperiénsia konabá sira nia partisipasaun individuál, partisipasaun iha grupu iha luta ba libertasaun.
“Importante, CO25 hein katak dikusaun sira ne’e bele tau iha eskritu iha gravasaun nune’e peskizadó-sira sira bele asesu ba iha informasaun sira ba livru ne’ebé mak Komite agora dadauk hakerek. Tamba ita nia historia ne’e kompleksu tebes, entaun ita presiza halo cross check ba informasaun-sira. Tanba ita hare katak, durante prosesu luta ba independénsia iha akontesimentu barak, no too ita konta kona-ba akontesimentu sira ne’e iha versaun oin-oin. Entaun tenke halo entrevista ema barak para atu bele cross check ninia verasidade akontesimentu ne’e hanusa” haktuir Constâncio Pinto.
Muzeu Cenário da Memoria do Povo
Muzeu Cenário da Memoria do Povo inisia iha 2003 no inagura iha 2012 husi Prezidente Repúblika Timor-Leste nian iha momentu ne’eba, Excia. Sr. Taur Matan Ruak no hetan bensaun husi Saudozu D. Alberto Ricardo Bispo Diocese Dili-nian.
Muzeu ne’e hari’i iha abrigo naturál Sub-Chefe do estado Maior das FALINTIL, David Alex “Daitula” nu’udar responsável ba rejiaun II. Iha fatin ne’e akontese reuniaun oi-oin entre forsa armada ho frente klandestina inklui enkontru jornalista saudozu Max Stahl ho David Alex “Daitula” iha Tinan 1991.
Hatán ba ezistênsia Muzeu Cenário da Memoria do Povo, Vise-prezidente I CO25-nian, Jacinto Alves iha nia diskursu hateten, presiza ema hotu ne’ebe hola parte iha momentu ne’eba kontribui ho nia historia nune’e bele kompleta senáriu tomak luta rezisténsia nasionál.
“Muzeu ne’e iha dokumentu barak, ita iha objetivu ida atu rekolla ita boot sira nia testemunha no memoria konaba funu, partisipasaun atu ki’ik ka boot ita presiza rekolla hodi tau hamutuk iha Muzeu ne’e, hodi esplika oinsa reziste, oinsa halo funu. Se ita boot sira la kontribui, ita nia história sai la kompletu. Tamba ne’e presiza duni atu rekolla ita boot sira ida-idak nia historia hodi bele kompleta senário tomak ba ita nia luta rezisténsia nasional” haktuir Jacinto Alves.
Jacinto Alves mos hateten, ho kontribuisaun história mak bele hatur muzeu ne’e hanesan senáriu memoria povu-nian nune’e, ema no jerasaun tuir mai bele hare oinsa ita nia povu luta iha David Alex “Daitula” nia sorin.
Remata