CONSTÂNCIO PINTO “TERUS” DEFENDE INDEPENÉNSIA OBRA KOLETIVU

Hera, 23 Agostu 2022 (CO25) – Prezidente Comité Orientadór 25 (CO25) hato’o bainhira sai oradór iha Semináriu internasionál ne’ebé realiza husi Universidade Nasionál Timor Lorosa’e (UNTL) parseria ho Institutu Nasionál Defeza (IDN) no Ministru Prezidénsia Konsellu Ministru iha Fakuldade Enjenaria no Teknolojia UNTL, Hera.

Semináriu Internasionál iha ámbitu Aniversáriu FALINTIL ba dala 47 ne’ebé mak ho tema “Incrementar os Valores das FALINTIL no Processo da Reconstrução Nacional” ne’e realiza atu partilla esperiénsia no koñesimentu-sira ne’ebé akontese ona iha tempu naruk nune’e sai referénsia ba dezenvolvimentu F-FDTL.

Prezidente CO25, Constâncio Pinto – Terus ne’ebé aprezenta tópiku “Relasaun Frente Armada ho Movimentu Juveníl iha Frente Klandestina” rekorda fila-fali asaun no atividade sira ne’ebé hala’o tiha ona iha tempu pasadu no hatete katak “Tuir Rezolusaun Aitana Nú. 4 mak hili nudar Sekretáriu Komite Ezekutivu Frente Clandestina no hahú kontaktu ho Frente Armada liu husi Komandante David Alex “Daitula” iha tinan 1987 to’o 1989. Liu husi organizasaun joven ida foin hahú naran OJETIL hodi Foti inisiativa tamba hanoin katak kontribuisaun joven sira nia atu reforsa esforsu FALINTIL nian iha ailaran mak oinsa atu disemina ka fanu komunidade internasionál konaba ita nia kauza”.

Constâncio Pinto reforsa katak movimentu estudante ne’ebe mak hahú iha Dili, hahu husi esternatu de São José. Nia hateten “Dalaruma asaun balu ne’ebe halo la konsulta komando Superior luta-nian tamba situasaun difícil, maibe hare katak asaun ida ne’ebe mak los no justo, ami halo”.

Bainhira hanoin fila-fali ba akontesimentu manifestasaun iha Santo Padre Paulo II nia vizita mai Dili iha loron 12 fulan Outubru tinan 1989, Prezidente CO25 ne’e haktuir katak “Akontesimentu Tasi-Tolu momentu ida ne’ebé iha tempu ne’eba ema hotu hein. Manisfestasaun tasi-tolu hanesan odamatan bo’ot ne’ebe nakloke ba ita hot-hotu, hahú husi ne’e mak tuir mai iha manifestasaun bar-barak tan”.

Nia haktuir tan katak, asaun sira ne’e hotu halo atu fanu komunidade internasionál, atu reforsa polítika esterna tan asaun sira ne’e núdar kilat musan ba Frente esterna liu husi informasaun, nune’e mos fo korazen ba FALINTIL-sira iha ai-laran.

Molok remata nia aprezentasaun, Prezidente CO25 reafirma “sempre defende katak independénsia Timor Leste ne’e esforsu koletivu ita hotu nian, ki’ik ka bo’ot. To’o labarik ki’ik sira iha momentu balu importante no determinante tebes ba ita nia funu maibe dalaruma ita haluha”.

Semináriu Internasionál ne’e loke ho diskursu husi Prezidente Repúblika, Dr. José Ramos Horta ne’ebé foka ba evolusaun Timor Leste nian durante tinan 20 nia laran mak progresu no dezafiu sira liga ba sustentabilidade Estadu no sustentabilidade instituisaun sira nian ba tinan sira tuir mai.

REMATA