GREGÓRIO SALDANHA: IHA INDPENDÉNSIA MAK POVU LA MORIS DIAK, INDEPENDÉNSIA LA IHA SENTIDU
Dili, 17 Maiu 2022 (CO25) – Prezidente Comite 12 Novembro, Gregório Saldamha “Mouris” hateten “Independénsia hanesan ponte to’o alvu ida ikus liu, alvu ne’e mak povu nia moris diak. Iha indpendénsia mak povu la moris diak, Independénsia la iha sentidu”.
Prezidente Comite 12 Novembro no eis prezidente Organizasaun Rezisténsia OJETIL, Gregório Saldamha “Mouris” hato’o lia hirak ne’e bainhira sai oradór iha Semináriu Nasionál ne’ebe organiza husi Comité Orientadór 25 (CO25) no Centro Nacional Chega (CNC) ho tema “Tinan 20 Restaurasaun Independénsia: Situasaun Real Tuir Ona Juventude Rezisténsia Sira-Nia Idealizmu Ba Libertasaun Pátria & Libertasaun Povu?” hodi komemora tinan 20 Restaurasaun Independénsia iha eis komarka Balide, Dili.
Mouris hateten mos katak “Durante tinan 20 prosesu lao, lao neneik no lais, diak no ladiak meibe lao nafatin. Iha tempu rezisténsia mehi ba povu mak moris diak, diak ho sentidu ekonómikamente diak, edukasaun diak, saúde diak, agrikultura diak no justisa ba ema hotu. Maske nune’e ohin loron tempu mak determina no ita lahatene bainhira, maibe haka’as-an nafatin atu lori povu to’o moris diak, nune’e povu bele sente rezultadu independénsia nian”.
Independénsia Ideáriu Heroi sira-nian
“Ideáriu no hanoin sira uluk mak hakarak Timor ne’e Livre husi dominasaun estranjeira. Luta tempu naruk ikus hetan duni ita nia liberdade ne’ebe ita bolu libertasaun Pátria. Independénsia ne’e ideáriu eroi sira-nian nu’udar komprimísiu ida nune’e ita hotu no jerasaun ba jerasaun, Independénsia ne’e prevalese nafatin, ita luta nafatin ba Independénsia nia rezultadu” prezidente Comite 12 Novembru ne’e hateten durante sai oradór.
Nia mos akresenta liu tan katak “Timor-Leste ida ohin lahanesan Timor-Timur ida uluk. Ita nia interese ida deit mak dezenvolve rai ida ne’e no povu ida ne’e ba moris diak. Maske iha diferensa hanoin, programa no konseitu-sira maibe ita labele diferente hanesan ema Timor. Timor tenke ida deit, deferente lian no kultura ne’e nu’udar rikusoin ida katak unidade iha diversidade laran […], uluk luta hasoru ema no ohin ita luta hasoru ita nia an rasik. Atu manan mak tenke iha toleránsia ba malu, umildade, koalia ba malu, fahe istória ba malu, kuriji malu desde tuir lei sira ho objetivu ida deit ba Timor-Leste nia futuru ida diak liu”.
Molok termina nia intervensaun, Gregória Saldanha mos hato’o katak “tinan 20 Restaurasaun Independénsia buat barak mak presiza halo, hanesan estudante sai nafatin forsa ba kontrola, hanesan governante buka ukun didiak, hanesan órgaun Parlamentar oinsa mak bele kontrola hodi aprova lei ruma. Entidade sira hotu tenke proativa tau matan ba kestaun sira ne’e ho ida-idak nia responsabilidade no servisu”.
Enkuantu Semináriu ne’e hala’o durante loron rua ho oradór-sira mais husi Organizasaun Juventude Rezisténsia sira no hetan partisipasaun maka’as husi joven no estudante-sira.
Remata