Molok rekolla dadus iha baze, CO25 harmoniza uluk metodolozia peskiza
MAUBISSE, 28 Abril 2019 (CO25) – Comité Orientador 25 (CO25) realiza workshop iha Maubisse durante loron tolu hodi haree progresu servisu husi kada ekipa peskiza, harmoniza metodolójia peskiza istória no Étika ka Kódigu Konduta CO25 ninian.
Workshop ne’e halo ho objetivu atu ekipa peskizadór-sira husi volime I to’o volume VII bele lao tuir giaun ida deit iha prosesu rekolla dadus primária iha baze.
Hafoin workshop, Prezidente CO25, Sr. Constâncio da Conceição Pinto “Terus” hateten katak, peskizadór-sira iha komitmentu ba peskiza ho profesionál.
“Ho workshop ida ne’e ita haree peskizador-sira iha duni komitmentu atu hala’o peskiza ne’e ho profesionál no kualidade hodi atinzi meta boot CO25 nian no kumpri duni tempu ka deadline ne’ebé mak iha”. Prezidente CO25 hato’o depois semináriu ne’e hala’o, 28 Abril 2019.
Prezidente CO25 mós hateten katak durante workshop sira klarifika mós dúvida balun.
”Workshop ne’e susesu duni tanbá ita bele klarifika dúvidas nomós kontribuisaun ne’ebé mak pozitivu tebes ba haforsa ita nia atividade liu-liu iha Peskiza Istória Organizasaun Juventude no Estudantil iha Luta ba Libertasaun Nasionál”. Tenik Constâncio da Conceição Pinto “Terus”.
Partisipa iha Workshop ne’e mak, Órgaun Diretivu, Membru Balun CO25, Ekipa Ezekutivu no Peskizador-sira CO25 nian.