Autoridade Munisípiu Baucau Prontu Kopera ho CO25 iha Prosesu Rekolla Dadus.

Baucau, 14 Agostu 2019 (CO25) – Prezidente Autoridade Munisípiu Baucau, António Guterres hateten katak, sira prontu kopera ho Comité Orientadór 25 iha prosesu rekolla dadus .

“Komitmentu husi autoridade munisipál, hau pronto atu kopera. Koperasaun entermus de sira presiza fatin ruma atu uza ba konferénsia, atu uza ba diálogu, atu uza ba intervista, ami fasilita. Fasilita mós fahe informasaun to’o iha nível postu hotu-hotu”.

António Guterres hateten lia hirak ne’e hafoin sorumutu sosializasaun CO25- konaba prosesu rekolla dadus ne’ebé reprezenta husi Sekretáriu Jerál CO25 Sr. Avelino Coelho “Salar Kossi” hamutuk ho Membru CO25 Sr. Aleixo Gama “Cobra” no Sr. Moisés da Silva iha Munisípiu Baucau.

Durante intervista ho mídia CO25-nian, Prezidente Munisípiu Baucau mós hateten katak, to’o ona tempu atu hatur loloos istória Timor-nian nune’e juventude-sira bele hatene akontesimentu-sira iha pasadu.
“To’o ona tempu atu hatur istória Timor-Leste nian iha ninia fatin, hodi hotu-hotu bele valoriza no rekoñese katak iha pasadu ne’e ninia lalaok ne’e nune’e, atu juventude-sira ne’ebé moris ikus ne’e hatene katak iha pasadu saida mak akontese, sé sé mak hala’o, sé sé mak envolve”, hateten António Guterres ba mídia CO25.

Programa sosializasaun CO25-nia ba autoridade lokál-sira ho objetivu atu habelar informasaun Servisu Comité Orientadór 25-nian no atu autoridade lokál-sira bele fasilita peskizadór-sira bainhira rekolla dadus iha baze.