Dr. Aurélio Guterres : Istória mak Abut Nasaun-nian

Dili, 7 Novembru 2019 (CO25) – Eis-reitór Universidade Nasionál Timor Lorosa’e (UNTL), Dr. Aurélio Guterres hateten katak, abut nasaun ida nian mak Istória, ho istória mak nasaun ida bele dezenvolve-an diak liu tan iha futuru.

“Ita hanesan nasaun ida, nasaun ida istória ne’e sai hanesan raiz, raiz ba nasaun ida. Nasaun ida kuandu la iha istória, nasaun ne’e la iha abut la iha raiz I depois ho raiz ne’e mak aprende husi istória, nia prepara, I depois nia projeta ba futuru, ho istória ajuda nasaun ne’e projeta ba future, oinsa mak istória ne’e bele ajuda para nasaun ne’e dezenvolve nia-an diak liu iha futuru. Liuliu bainhira ita koalia kona-ba istória resisténsia porque istória resisténsia halo parte faze importante ida iha resisténsia Timor hanesan nasaun ida, hanesan pais ida, hanesan povu ida”.

Hateten Dr. Aurélio Guterres ba mídia CO25 bainhira partisipa iha Konferénsia Nasionál Dahuluk ne’ebé Comité Orientadór 25 realiza, 7 to’o 8 Novembru iha Sentru Konvensaun Dili.

Dr. Aurélio Guterres mós dehan katak, existensia Comité  orientadór 25 importante, tamba ho Comité orientadór 25- nia servisu ne’e bele hahú dadauk ona, bele kontribui laos deit ba iha ita nia istória mais bele kontribui para ba dezenvolvimentu nasionál. Tamba dehan katak ita kuandu koalia kona-ba istória laos deit ita hare husi istória nia esensi, autór, mais husi aspeitu kultural, husi aspeitu sosiedade ne’e rasik ne’ebé  fo servisu ho inisiativa ida ne’e ho CO25- ninia prezensa bele halo servisu boot ida ba ita nia rain”.

Dr. Aurélio Guterres mós fó parabéns ba Comité Orientadór 25 ho ekipa komisaun organizadora tomak ne’ebé hahú dadaun halo peskiza ba Istória Rezisténsia.