Hugo Fernandes hateten, liberdade ba entidade hot-hotu atu kontribui ba konstrui istória Timor-nian
Dili, 7 Novembru 2019 (CO25) – Hugo Fernandes hateten, liberdade ba entidade hot-hotu atu kontribui ba konstrui istória Timor-nian.
Lia hirak ne’e hato’o bainhira partisipa iha Konferénsia Nasionál dahuluk ne’ebé Comité Orientadór 25 realiza, 7 to’o 8 Novembru 2019 iha Sentru Konvensaun Dili.
Diretór Ezekutivu Centro Nacional Chega, Hugo Maria Fernandes hateten katak, “Istória Timor-nian labele Manipuladu, labele monopoliza husi ema ho entidade ida, entidade hotu-hotu iha dever, iha obrigasaun atu konstrui liu husi dalan ne’ebé mak sira fiar katak, dalan ida ne’e diak ba sira atu konstrui istória”.
Comité Orientadór 25 hahú ona deskute ho Centro Nacional Chega iha kedas tinan kotuk atu oinsa bele utiliza dokumentu balun ne’ebé arkiva ona iha CNC.
“Iha kedan tinan kotuk, hahú diskusaun entre Centr0 Nacional Chega ho Comité Orientadór 25 kona-ba oinsa mak Comité Orientadór 25 bele asesu arkivu CNC nian. CNC hanesan ita hotu hatene iha mais 2000 arkivu iha ne’ebá, iha dokumentu , iha video, iha Audiu i odamatan nakloke ba iha Comité Orientadór 25 iha Tinan kotuk kedan”, hateten Hugo Fernandes ba mídia CO25.
Nia hatutan tan katak, “sei apoiu , apoiu ba peskiza ne’ebé mak Comité Orientadór 25 halo, dokumentasaun ne’ebé mak iha , bele kontinua halo diskusaun para depois bele tulun malu”.
Diretor Ezekutivu Centro Nacional Chega, Hugo Maria Fernandes mós kongratula CO25 no hein rezultadu husi servisu peskiza CO25-nian.