Terus: Veteranu-sira Presija Hetan Tratamentu Saúde diak no Dignu husi Governu
Dili, 11 Novembru 2019 (CO25) – Prezidente Comité Orientadór 25, Constâncio Pinto “Terus” husu guvernu atu fo tratamentu saúde diak no dignu ba Veteranu-Sira.
Lia hirak ne’e hato’o bainhira ho membru-sira CO25-nian halo vizita ba Sr. Julião Mausiri “Metan Zebra” ne’ebé baixa iha óspital nasionál Guido Valadares tan hetan moras sériu iha ulun.
Prezidente Comité Orientadór 25, Constâncio Pinto “Terus” hateten katak, “veteranu hot-hotu kumpri ona dever atu servi nasaun iha tempu ne’ebé defísil luta ba ukun-an, to’o ona tempu veteranu-sira ejiji sira-nia direitu atu hetan tratamentu ne’ebé dignu ba saúde ne’ebé mak diak”.
Prezidente Comité Orientadór 25, Constâncio Pinto “Terus” mós rekomenda ba governu katak, “Veteranu-sira presija hetan tratamentu espesífiku ba sira-nia saúde, labele hein deit halo omenajem” no “husu governu atu interven imediatu ba kondisaun saúde Sr. Julião Mausiri-nian hadi halo tratamentu médiku iha Malázia”.
Sr. Julião Mausiri “Metan Zebra” nudar membru Comité Orientadór 25, atuál Sekretáriu Jerál Organizasaun Juventude OPJLATIL no fundadór ida mós ba organizasaun ne’e.