Constâncio Pinto : Ita responsabiliza asaun manifestasaun, laos masakre
Baucau, 28 Outubru 2019 (CO25) – Prezidente Comité Orientadór 25, Constâncio Pinto “Terus” hateten katak, “masakre ne’ebé akontese iha Santa Crus responsabilidade Indonézia-nian, ita la responsabiliza”.
Prezidente Comité Orientadór 25 hato’o relasiona ho preokupasaun joven no estudante ne’ebé seidauk hatene diak kona-ba akontesimentu 12 Novembru 1991.
Lia hirak ne’e hato’o bainhira sai oradór iha Semináriu ne’ebé realiza husi Instituto Católica para Formação dos Professores (ICFP) kona-ba istória Timor-nian ho tópiku “Envovimentu Juventude iha luta ba Libertasaun Nasionál” iha Baucau.
Prezidente Comité Orientadór 25, Constâncio Pinto “Terus” esplika katak, “12 Novembru 1991 akontese asaun rua, ida mak asaun pásifika ka manifestasaun, ida seluk mak asaun ne’ebé militar Indonézia-sira halo hodi hamosu masakre”.
Constâncio Pinto “Terus” mós hateten katak, “ita responsabiliza ba asaun pasífika ka manifestasaun, laos masakre. Masakre ne’e mak violasaun direitu-umanu ne’ebé militar Indonézia uluk halo”.
Alende ne’e, directór Instituto Católica para Formação dos Professores (ICFP) Baucau, Ir. Paul Gilchrist, FMS iha nia introdusaun hateten katak, “semináriu ne’e halo atu motiva joventude-sira atu iha responsabilidade, komitmentu no hadomi ba nia-rai hodi kontribui ba sosiedade”.