Autór Luta Libertasaun Nasionál Munisípiu Ainaro prontu Koopera hodi fó sai dadus istóriku ba CO25
Ainaro, 5 Dezembru 2019 (CO25) – Iha Konferénsia Munisipál ne’ebé Comité Orientadór 25 ( CO25) hala’o iha loron kinta feira (05/12) iha Salaun Administrasaun Munisípiu Ainaro, Konsellu Veteranus hamutuk ho Organizasaun Juvenil no Estudantil sira iha Munisípiu Ainaro ho haksolok no prontu atu fó sai sasin no dadus istóriku luta libertasaun nasionál-nian ba iha Comité Orientadór 25 hodi bele hakerek livru istória ba jerasaun tuir mai.
Sekretáriu Konsellu Veteranus Munisípiu, Ainaro, Moises Sarmento da Costa iha nia entrevista ho Média CO25 nian hateten katak, Konsellu Veteranus ho Autór ba luta libertasaun nasionál iha munisípiu Ainaro prontu hamriik hamutuk ho CO25 hodi salva guarda faktus istóriku sira ba jerasaun foun sira tuir mai.
” Hanesan Konsellu Veteranus Munispiu Ainaro, sente Orgullu i kontente bele hasoru fila fali ita nia organizasaun rezisténsia ne’ebé ke halibur iha Comité 25 ne’ebé iha Vizaun no objetivu ida di’ak bele fó sentidu pozitivu ida hakerek istória ida ne’ebé ke loos” hateten Sekretáriu Moises Sarmento
Nia mós rekomenda ba Comité Orientadór 25 atu kontinua ba to’o iha baze sira hodi nafatin haklaken misaun no vizaun CO25 nian atu nune’e autór no sasin ba luta sira bele koopera hodi kontribui ba servisu CO25 iha prosesu peskiza ho hakerek livru istória rezisténsia.
Iha sorin seluk Reprezentante Organizasaun Rezisténsia ” FITUN” Osório Bianco Ximenes de Araujo Afirma mós katak nia parte sei koopera hodi fó sasin no dadus istóriku sira mak loos no justu ba iha ekipa CO25 nian
” ami sei firme no sei la fó espasu ba buat falsu sira ida ne’e ami prontu kontribui, katak Comité Orientadór ninia servisu tenke sai ho nia rezultadu ne’ebé di’ak. Em prinsipál ami sei la fó espasu para buat falsu ka buat bosok balun tama iha servisu Comité Orientadór nian” hateten Osório ba Media CO25
Nia mós Espera katak ho ezisténsia Comité Orientadór 25 sei hatúr istória rezisténsia Timoroan sira nian ho verdade no Justu liu husi produsaun livru istória rezisténsia-nian hodi sai hanesan bukae ba jerasaun foun sira bele hatene hun no rohan luta libertasaun nasionál.