Constâncio Pinto “Terus” : Istória importante ba ita atu hametin ita nia espíritu Nasionalizmu no patiotizmu
RAEOA, 12 Dezembru 2019 (CO25) – Prezidente Comité Orientadór 25, Constâncio Pinto “Terus” hato’o lia hirak ne’e iha abertura Konferénsia Munisipál ne’ebé CO25 realiza iha Rejiaun Autónoma Espesiál Oé-Cusse Ambeno (RAEOA).
Constâncio Pinto “Terus” hateten katak, Comité Orientadór 25 harií husi Sétimu Governu Konstitusionál atu hakerek istória rezisténsia ne’e ho loloos no kredivel.
“Balu konta istória, istória ne’ebé nia hare, nia halo, no nia konta tuir, ida ne’e laos istória ne’ebé ita atu hakerek. La’os ida ne’e mak istória ne’ebé atu hakerek, Tanba ne’e mak Comité Orientadór 25 harii iha sétimo governu konstituisionál atu hakerek istória ne’ebé kredivel”, hateten prezidente CO25 iha konferénsia municipal ne’ebé realiza iha salaun alfandega RAEOA.
Prezidente CO25 mós hateten katak, istória importante atu hametin espíritu nasionalizmu no patriotizmu tamba jerasaun foun ne’ebé tuir mai se lahatene istória, sira sei lakon nasionalizmu no patriotizmu.
Partisipa iha konferénsia ne’e órgaun diretivu no membru CO25, reprezentante prezidente RAEOA, kosellu veteranu ho estrutura, veteranu no partisipante besik atus tolu.