José : Fasil koalia Istória maibé la fasil halo Istória
Manufahi, 3 Dezembru 2019 (CO25) – Administradór Interinu Munisipíu Manufahi, José Antonio Braz hateten lia hirak ne’e bainhira halo abertura ba konferénsia munisipál ne’ebé CO25 realiza iha salaun administrasaun munisípiu-nian.
José António Braz mós hateten katak atu alkansa ukun rasik-an ne’e la’os buat fasil ida maibé nu’udar prosesu ida ne’ebé naruk tebes no nakonu ho sofrimentu oin oin no ohin loron prosesu sira ne’e sai hanesan istória ne’ebé prwsija hakerek ba jerasaun foun sira hodi bele hatene katak luta mai to’o ukun rasik aan la’os buat fasil ida
” Buat sira pasadu sai hanesan istória buat ne’ebé ohin ita hakerek aban bainrua sai hanesan istória, ohin loron ita tur Independénsia hanesan mai husi istória ida. Istória la’os buat bai bain ida, fasil ita ko’alia istória maibé la fasil atu halo istória” Hateten Adiministradór Interinu José Antonio da Costa Braz iha nia intervensaun iha Konferénsia Munisipál ne’ebé hala’o iha Salaun Administrasaun Munisípiu Manufahi tersa feira ( 03/12)
José Antonio hatutan, Veteranus no sobre vivente sira hotu atu presija konta no hakerek istória sira ne’ebé mak iha ba Jerasaun sira tuir mai hodi nune’e sira bele hatene prosesu luta Timór oan nian mai to’o hetan independensia.
” Imi mak hasoru barak liu imi mak istória liu tanba ne’e mak oan sira bainhira la ba eskola bolu tur iha ita nia sorin konta hodi sira hakerek, ita la bele hakerek sira hakerek se ita bele entaun hakerek” Nia Enkoraja
Iha Parte Seluk Sekretáriu CCLN Munisipiu Manufahi Antoninho Doutel Sarmentu hateten istória sira presija buka tuir no hakerek no bele hetan nia justu atu bele sai hanesan referénsia ba jerasaun foun sira tanba ohin loron ema ida idak hakerek hodi públika tuir sira nia hakarak .
” Rai independénsia ona ema ida idak hakerek nia istoria tau iha média sosiál kaer istória hodi gaba aan mesak mesak entaun ita nia istória exeptu tenke tau iha koluna ida, para istória ne’e tenke loos no istória ne’e bele konsolida iha matéria ba jersaun foun sira” Hateten Antoninho iha nia Intervensaun.
Nia mós husu ba Veteranus no sobre viventes sira hotu atu konta istória tuir partisipasaun ne’ebé mak iha, hakerek tuir sakrifísiu ne’ebé halo ne’e tenke hateten halo didi’ak bainhira iha dokumentu rezisténsia balu ne’ebé komprova ba partisipasaun luta nian tenke hatudu no lori sasin sira halo didi’ak para hakerek istória sira ne’e ho loloos.
Entretantu Konferénsia Hanesan realiza iha munisípiu hotu inklui RAEOA atu sosializa ezisténsia CO25 no halibur informasaun-sira husi autór-sira ne’ebé luta ba ukun-an nune’e Comité Orientadór 25 bele hakerek iha livru istória.