Nakfilak: Istória hanesan fator importante, povu ida atu asegura nia rai, atu asegura nia klamar
Baucau, 6 Dezembru 2019 (CO25) – Segundo Vise-prezidente Interinu CO25 hato’o lia hirak ne’e molok abertura Konferénsia Munisipál ne’ebé Comité Orientadór 25 realiza iha Sentru Konvensaun Baucau.
José Manuel Fernandes “Nakfilak” hateten katak, “Konferensia ne’e mai ho nia objetivu mai ho nia natureza, atu aprezenta nia vizaun no misaun. Livru ne’ebé CO25 hakerek laos livru individu ida nian ka ema ida nian, laos partidu ida nian maibe livru ida ne’ebé povu-nian no reprezentativu”.
Iha abertura ofisiál Konferénsia Munisipál CO25-nian, reprezentatnte prezidente munisípiu Baucau, Maria Viegas hateten katak, “istória munisípiu Baucau la hanesan ho munispiu seluk, hakerek istória ho loloos atu nune’e juventude sira bele la’o tuir”. Nia mós agradese tebes ba CO25 nia prezenja hodi realiza konferénsia iha munisípiu Baucau.
Alende ne’e, Prezidente Consellu Veteranu munisípiu Baucau, Fernando Gusmão “Bere-Du” iha nia intervensaun “husu ba veteranu-sira atu konta istória ho loloos”.
Lia hanesan hato’o mós husi membru CO25-nian, Aleixo Gama “Cobra”, iha nia introdusaun husu ba veteranu-sira atu konta sira-nia istória, nune’e CO25 bele hakerek ba jerasaun-sira tuir mai.