PRESS RELEASE
Comité Orientador 25 (CO25), estabelese bazeia ba Resolução do Governo no. 1/2017, 9 de Janeiro de 2017 ho nia mandatu atu peskiza no hakerek livru kona-ba Luta Frente Urbana, Frente Klandestina partikular-liu envolvimentu foin-sa’e no Estudante-sira iha Luta Libertasaun Nasionál.
Iha serimónia tomada de posse ba membru CO25, líder karizmátiku Maun-Boot Kay Rala Xanana Gusmão dezafia CO25 atu labele foku deit ba istória juventude ho estudante-sira nian iha Luta ba Libertasaun Nasionál, maibé haree mós ba partisipasaun povu tomak iha luta ba ukun rasik-an.
Ho ida ne’e, CO25 hakarak informa ba públiku, katak:
Durante tinan tolu, CO25 hahú ona halo nia kna’ar peskiza iha rai laran no mós iha rai-liur hodi rekolla informasaun no dokumentu-sira husi autór-sira ne’ebé partisipa luta ba Libertasaun Nasionál.
CO25 halo ona intervista ba autór prinsipál besik ema nain atus tolu no rekolla ona dokumentu-sira hanesan karta no fotografia importante, liu rihun ida. Dokumentu-sira ne’e barak liu hetan iha Portugal no balun iha Timor no dadus-sira ne’e arkiva hela iha CO25 atu peskizadór-sira halo análiza nune’e bele hakerek livru.
Dokumentu barak konabá Luta Libertasaun Nasionál-nian iha mós rai seluk ne’ebé CO25 seidauk to’o ba, hanesan Indonézia, Austrália, Kanadá, Estadus Unidus Amérika no seluk tan. Ida ne’e, CO25 mak iha kompeténsia sei lori dokumentu-sira ne’e mai.
Inísiu fulan Novembru 2019, CO25 mós realiza ona Konferénsia Nasionál I ne’ebé konvida péritu husi rai liur no iha rai laran hodi fahe matenek konabá Peskiza Istória. Realiza mós Konferénsia Munisipál iha munisípiu sanulu resin rua inklui RAEOA hodi habelar servisu CO25-ninian no identifika autór luta-sira, nune’e kontinua intervista hodi kompleta dadus ba hakerek Istória. Iha konferénsia munisipál, kuaze veteranu hotu apresia no haksolok ho ezisténsia CO25-nian. Sira husu atu peskiza CO25-nian kontinua nafatin nune’e bele prezerva istória loloos luta-nian ba jerasaun tuir mai. Sira mós dehan atu CO25 lao ba ema hotu ne’ebé partisipa iha luta hodi rekolla sira-nia memória.
Bainhira CO25 hahú nia servisu publika ona Revista História da Resistência edisaun I no II ne’ebé kolekta artigu konaba istória husi estudante no akadémiku-sira, kontempla mós atividade no progresu servisu CO25-nian. Publika mós Coffe Table Book (CTB) ne’ebé haree liu ba memória pesoál autór-sira ne’ebé luta ba ukun-an.
CO25 partisipa no sai oradór iha konferénsia-sira ne’ebé estudante universitáriu-sira organiza hodi habelar servisu CO25-nian no iha posibilidade atu hahú dadaun fahe informasaun konabá istória iha Universidade.
Oras ne’e dadaun, CO25 iha nia peskizadór prinsipál nain sia (9) no asistente peskizadór na’in neen (6), Órgaun Ezekutivu nain ualu (8) hamutuk ho Voluntáriu nain sanulu-resin ualu (18). Parte ida forma mós rekursu umanu ba peskiza istória-nian.
Alende hakerek livru husi Volume I to’o Volume VI ne’ebé iha hela prosesu peskiza, CO25 mós iha planu atu hakerek livru istória ba estudante ensinu báziku-sira nune’e bele tulun labarik-sira hatene istória Timor-nian.
Hakerek Istória Rezisténsia Povu Timor-nian, CO25 sei haka’as-an hodi hakerek istória ida ne’ebé bele reprezenta ema hotu nia testemuña hodi hatúr istória ne’ebé ho loloos.
Dili, 09 de Janeiro de 2020
Comité Orientador 25 (CO25)
Ba Informasaun, bele kontaktu:
Email : janu@comiteorientador25.org, comiteorientador.co25@gmail.com
No. Hp : +670 77294942, 78098466