Líder Organizasaun Rezisténsia-sira Preukupa ho Situasaun Polítika ne’ebé Oras ne’e Akontese.
Dili, 25 Janeiru 2020 (CO25) – Prezidente Comité Orientadór 25, Constâncio Pinto “Terus” hato’o lia hirak ne’e hafoin halo enkontru ho membru-sira hotu CO25-nian hodi koalia konaba situasaun polítika ne’ebé akontese dadaun iha Timor.
Prezidente CO25, Constâncio Pinto “Terus” hateten katak diskusaun ne’e halo atu bainhira iha karik konvite husi prezidente repúblika, líder organizasaun rezisténsia iha ona hanoin natón hodi tulun prezidente repúlika hodi foti desizaun.
“Ohin reuniaun Organizasaun rezisténsia-sira ne’ebé sai membru ba iha Comité Orientadór 25 hamutuk senulu resin neen ne’ebé mak sai autóres ba eventu istóriku ba iha ita nia funu iha sidade laran iha frente Klandestina, hatudu katak ami preukupa ho situasaun agora no hakarak hetan solusaun ne’ebé mak urjente ba situasaun polítika ne’e”. prezidente CO25 ba Jornalista-sira.
Prezidente CO25 mós akresenta liu tan katak, “durante diskusaun membru-sira hotu kuaze lakohi atu iha eleisaun antesipada, primeiru tamba ita iha tinan tolu tan deit ba kompletu governasaun ne’ebé mak iha, segundu ita presija kria estabilidade no terseiru eleisaun antesipada mós la halo diferensa boot ba rezultadu. Tamba ne’e mak ita presija tempu ida atu bele prepara-an didiak ba eleisaun mai, eleisaun jeral ne’ebé mak sei fo rezultadu satisfatóriu”.
Partisipa mós iha reuniaun ne’e Jurista Timoroan nain rua, Dr. Manuel Tilman no Dr. Avelino Coelho “Shalar Kosi” hodi fahe prespetiva jurídika ba situasaun polítika ne’ebé akontese.