Riak Leman : “joventude-sira uluk ne’ebé oras ne’e katuas ona atu konta istória luta ukun-an nian ba jerasaun foun”

Dili, 15 Fevereiru 2020 (CO25) – Prezidente Konsellu Kombatente Libertasaun Nasionál, Vidal de Jesus “Riak Leman” husu ba joventude-sira uluk ne’ebé oras ne’e katuas ona atu konta istória luta ukun-an nian, nune’e, joventude jerasaun foun bele hatene.

“…juventude ida katuas ona ne’e, hanesan ami sira ne’e iha frente armada, frente klandestina tenke konta istória, labele konta istória iha surat-tahan deit, maibe kuandu iha konsentrasaun ruma, iha festa ruma, iha reuniaun ruma, konta verbalmente ba sira, nune’e bele hatene”. Riak Leman hateten ba ekipa peskizadór Comité Orientadór 25-nian bainhira halo intervista ba nia iha nia rezidénsia hodi kompleta dadus ba hakerek istória rezisténsia.

Riak Leman mós husu joventude jerasaun foun-sira atu kaer metin nafatin valór rezisténsia iha sira-nia atuasaun no komportamentu.

“ita preukupa juventude-sira jerasaun foun mai ne’e la hatene saida mak funu, sira hanoin dehan buat diak hela hanesan ne’e. tamba juventude ida uluk ninian hamutuk ho FALINTIL sira, hamutuk ho povu, sira ne’e terus. Joventude-sira jerasaun foun diak liu banati tuir saida mak imi nia inan-aman, imi nia maun-sira, tiun-sira halo. Tamba ita ne’e ukun-an dala ida deit, tan ne’e tenke kuidadu hanesan osan-mean, atu hanesan osan-mean tenke rona-malu, fiar-malu, labele insulta-malu”, hatutan atuál prezidente Konsellu Kombatente Libertasaun Nasionál.

Durante intervista, veteranu Vidal de Jesus “Riak Leman” hato’o nia istória, pasajen luta ba ukun-an ne’ebé nia-halo iha frente armada no frente klandestina.