CO25 HO SEJD DESKUTE PROGRESU SERVISU NO PESKIZA ISTÓRIA

Dili, 14 Jullu 2020 (CO25) – Konsellu Diretivu Comité Orientadór 25-nian, halo audénsia ho Seckretáriu Estadu Juventude no Desportu, Sr. Abrão Saldanha hodi koalia kona-ba ezisténsia no servisu peskiza CO25-nian.Hafoin reuniaun, Prezidente Comité Orientadór 25, Sr. Constâncio Pinto “Terus”, ba jornalista-sira hateten katak, haksolok tambá Sekretáriu Estadu Juventude no Desportu fó apoiu tomak ba servisu peskiza CO25 ninian.

“Ami haksolok tebtebes, tambá bele iha oportunidade hodi deskute servisu peskiza CO25-nian, nune’e mós informa progresu servisu no atividade-sira ne’ebé CO25 halo ona. Tambá Comité Orientadór 25 mós tutela ba Sekretáriu Estadu Juventude no Desportu ho apoiu sira ne’ebé mak iha CO25 konsege halo ona servisu lubuk ida”, hateten Prezidente CO25.

Durante reuniaun, Sekretáriu Estadu Juventude no Desportu, Sr. Abrão Saldanha, hateten katak, peskiza istória importante nune’e durante nia mandantu sei apoiu ba servisu Comité Orientadór 25-nian.

Enkuantu Konsellu Diretivu CO25-nian ne’ebé partisipa iha reuniaun kompostu husi Prezidente CO25, Constâncio Pinto “Terus”, Adjunta Sekretáriu Jeral CO25, Maria Dadí Soares Magno, akompaña husi diretora ezekutiva CO25-nian, Eugénia Correia.